Filipino Poem na Pambata Grade 1 to Grade 6

Halimbawa ng tula na may anim na taludtod (linya) sa bawat saknong.

Sa Aking mga Magulang
ni: Jerome Apilla

Kayo ang dahilan ng aking hininga
Ako ay nabuo sa inyong kalinga,
Pag-ibig na wagas, totoo’t dakila,
Ang siyang nagbigay ng lakas ko’t sigla
Hinubog ang aking damdamin at diwa,
Kasama ko kayo sa ngiti ko’t luha.

Sa aking pagtulog sa gabing madilim,
Nagbabantay kayo hanggang sa mahimbing,
Hindi hahayaang lamok ay kagatin,
Pati na ang init, pilit papawiin,
At kung ako ma’y tuluyang magising,
Nakangiti kayong sasalubong sa akin.

Hindi nga maliit ang sakripisyo n’yo.
Simula nang ako’y maging isang tao,
Kaya naman ako’y may mga pangako
Mga utos at hiling ay susundin ko,
Igagalang kayo at irerespeto,
At mamahalin sa buong buhay ko!

Isang Tulang Pambata
Grade 1 to Grade 6

Iba pang Tulang Pambata

• Ang Filipino ay Wikang Panlahat, Ilaw at Lakas sa Tuwid na Landas

Read more...

Maikling Tulang Tagalog

Maikling Tulang Filipino

Tumawa Ka
ni: Jerome Apilla

Tumawa ka
sa problema,
Sabi ng iba.

Tabla kayo,
Ng problema mo,
Tumatawa kayo pareho.

Pero wala siyang sugat
Ni peklat,
Ikaw ang silat.

Tatawa ka,
Ikaw ang tanga,
Problema’y maligaya.

Hindi dapat tawanan,
Dapat solusyunan
Pagkat kailangan.

Hindi makukuha
Sa pagtawa
Ang lintik na problema.

Utak: paganahin,
Katawan: pakilusin
Sa mga suliranin.

Kailangang mahagip,
Kailangang mag-isip
Hindi ang bibig.

Huwag pakinggan
Ang kasabihan,
Walang basehan.

Ikilos ang kamay
Diyan nakasalalay
Ang iyong buhay.

Marami sa ating mga Filipino ang dumaranas ng katakut-takot na problema. Mula sa kahirapan hanggang sa mga ganid na politicians. Kailangan nating kumilos at maging mapanuri, hindi lamang pagtawa sa mga nakabilad at nagdudumilat na mga problema ng ating lipunan.

Many Filipinos are suffering many problems; from poverty to politicians seeking financial gain. We should be observant and act now before its too late.

Read more...

Isang Tula na Nagbibigay ng Aral

Ang Mabuting Aral
ni: Tess C. Alikpala

Ako’y nakabasa ng isang kaisipan,
Sa banal na aklat na kasulatan,
Ang nagpapakataas ay ilalaglag diyan
At ang mabababa’y itataas naman.

Huwag mong daanin sa boses na sigaw
Ang liwanag na gusto mong matanaw,
Baka maibulid ka ng mga alingawngaw,
At ng mga tinig na pumapaibabaw.

Isipin sa tuwina ang kalalabasan
Ng salita at tinig na ipadadaan,
Sapagkat malayo sa katotohanan,
Mga binigkas ay kasinungalingan.

Maging mapanuri sa buhay na ito,
Hindi laging tama ang mga nasa diyaryo,
Huwag maniniwala baka lang malito,
At mapapunta sa apoy ng impiyerno!

May ligayang hatid ang mga nababasa
Kung totoo at laging nasa tunay ang nasa,
Ngunit nakakatulig kung wala namang kwenta,
Puro paninira at laging disgrasya.

Salat sa unawa at katotohanan
Ang likhang-isip ay likhang garapalan,
Huwag gumamit ng ibang nilalang
Wala naman silang dito’y kinalaman.

Kung makakasagasa ng tao sa kalye,
Huwag nang ituloy, mga pasakalye,
Mabuti lang sana kung mga diskarte
Ang masasagasaan ay malagkit na tae.

Pero itong kaganapan ay nakasakit
Ng damdaming mainam dito sa malapit,
Kaya nag-alsa ang ugat sa leeg,
Wala kasi sa linya ang iyong mga hirit.

Sana’y magising at huwag pumalaboy,
Huwag maging hangal na tila sa baboy,
Dapat ay hindi na lamang itinuloy,
Ngayon lumabas ang pagiging abnoy.

Naging ganito rin ang naging kapalaran
Pero inamin ang mga kasalanan,
Kaya silang dati’y nagi kong kalaban,
Ngayon kami’y isa na nagmamahalan.

Kaya bukas sa iyong paggising,
Ang dasal ko at mga panalangin,
Magising kang tunay sa pagkakahimbing,
Huwag tumulad sa isang kambing!

Example ng Tagalog na Tula na Nagbibigay ng Aral at Payo

Iba pa:

• Halimbawa ng Isang Malayang Tula
• Tagalog na Tula sa Tuluyan

Read more...

Filipino Poem About Childhood Memories

Halimbawa ng Tagalog na Tula ng Isang Pagbabalik-tanaw sa Kamusmusan

Credit: http://definitelyfilipino.com/blog/2012/04/22/alaala-ng-kahapon/

Alaala ng Nakaraan
ni: Naty Martinez

Mga nakaraang kay sarap balikan
Masasayang araw noong kamusmusan
Akala mo lagi walang katapusan
Kaligayahan ay di na mapaparam.

Sa may tabing-dagat, kami'y naglalaro
Buhanging kay puti paa'y tinatago
Para bang ang lungkot doon ay kay layo
Paraisong tunay wala ng siphayo.

Doon ay may tulay na dinadaungan
Ng mga sasakyan na galing sa guiuan
Yari man sa kahoy matibay din naman
Sapagka't binuo sa pagtutulungan.

Dito rin sa tulay ay merong rituwal
Lalo't bakasyon ng mga kabataan
Pagkakatapos ay tinutulak nalang
Libre na sa langgas wala ng gamutan.

Ang tubig sa talon pagkaganda-ganda
Sa tuwing maliligo doon nagpupunta
Mga taga baryo doon naglalaba
Sagana sa tsismis pagkasaya-saya!

Pag naiisipang kumain ng buko
Yakag ang barkada sa niyugan ang tungo
Bitbit ang asukal,itak at kutsilyo
Doon maghahanap aakyating puno.

Pagkasaya-saya ng buong barkada
Panay na babae pag-akyat di kaya
Pinipilit pa ring umakyat ang isa
Hanggang magtagumpay buko'y malaglag na.

Madalas mangyari ay puro tawanan
Pag bukong napitas wala palang laman
Aakyat na muli kahit magasgasan
Bukong ninanasa dapat na matikman.

Ang masaklap nito pag-uwi sa bahay
Baka may pamalo na hawak si nanay
Yon palang asukal na aming tinangay
Panghalo sa suman ang sabi ng tatay.

Di baleng mapalo nasiyahan naman
Nakaw na asukal kay tamis din naman
Barkadang kay kulit na napagalitan
Nagkatinginan lang at nagkatawanan.

Pagka sarap-sarap na balik-balikan
Mga karanasan noong kamusmusan
Dulot na ligaya di kayang pantayan
Lalagi sa isip kahit tumanda man…

Iba pang Tula ni Naty Martinez

Tula Tungkol sa Kalikasan
Tula Para sa Lolo at Lola
Isla ng Homonhon

Read more...

Inuulit na Tugmaan sa Taludturan

Halimbawa ng tula sa Pilipinas na may inuulit na salita sa bawat taludtod. Ito ay paglalarawan sa mga out-of-school youth na nagkalat sa kalsada ng ating bansa na tila nalilihis ng landas na nilalakaran. Ang tula ay mayroon ding sukat (lalabindalawahin) sa mga taludtod at tugma (rhyme) sa huling bahagi ng linya na siyang nagpaangat ng kahalagahan (essence) ng bawat saknong.

BUSABOS
ni: Kiko Manalo

Baku-bakong pait ay sininghut-singhot
Inamuy-amoy n’ya’t nagkalimut-limot.
Ang utak na wari’y buslong lusut-lusot,
Ay tila pisi ring nagkalagut-lagot!

Hinugot-hugot ng pagkagaling-galing,
Ang buntung-hiningang pagkalalim-lalim,
Malayong-malayo tumitingin-tingin,
Itong mga matang nagkaduling-duling!

Pumikit-pikit pa, nagpalingun-lingon
Hanggang doon lamang nagkabaun-baon
Sa gitna ng lungsod - parito’t paroon
Doon saka dito nangagtipon-tipon.

Nagkagulo-gulo’t nagkasira-sira
Pangarap at ngiti’y nagkagiba-giba,
Ngunit sa lansanga’y pagkatuwa-tuwa
Nagpalabuy-laboy, nagpagala-gala!

Ngayon ay tulalang hinihintay-hintay
Oras-katapusang pagkahusay-husay
Nais nang wakasan, mga buhay-buhay,
Dulung-dulo sana nang lumubay-lubay!

• Ang Filipino ay Wikang Panlahat, Ilaw at Lakas sa Tuwid na Landas

Read more...

Isla ng Homonhon - Isang Tulang Pasalaysay

Halimbawa ng isang Tulang Nagsasalaysay ng isang Panaginip

Panaginip Lang Pala
ni: Naty Martinez

Sa aking pagkakasandal sa lilim ng punong mangga
Matamang pinagmamasdan alapaap na kay ganda
Mga ibong lumilipad dumadapo kapagdaka
Sabay huni na tila ba sinasabing " kumusta ka?"

Sa huni ng mga ibong tila baga kumakanta
Di ko mapigil ang antok di naglao'y naidlip na
Nanaginip kapagdaka sa isang isla napunta
Homonhon ay narating ko kay lapit lang naman pala !

Anong laking pagtataka pagdaong ng sinakyan ko
Ibang-iba na nga pala isla na sinilangan ko
Bahayan na ang baybayin kay dami ng mga tao
Ngunit wala ng kilala paano na kaya ako?

Bahay na kinalakihan hinanap ko agad-agad
Upang doon ay mapawi pananabik sa kausap
Nguni't di ko akalaing ako pala'y magugulat
Pagka't wasak na nga pala ang bahay na hinahanap.

Sa likuran ng bahay ay may hardin din ako dati
Nakaharap sa dagat at ang bulaklak ay kay dami
May kubo na pahingahan naka-upo dun parati
Habang pinagmamasdan ang mga along malalaki.

Nakakalungkot isipin pagdalaw ay naunsiyami
Ang luha ko ay nangilid pumatak na unti-unti
Para akong basang-sisiw nakasandal humihikbi
bigla akong ginising ng asawa kong nakangiti.

Panaginip lamang pala sayang naman ang luha ko
Sana naman pag-uwi ko saya naman ang matamo
Sana'y 'wag lang panaginip bakasyon na pangarap ko
Sa Homonhong minamahal ganda'y tila paraiso !!!!!!!!!!!

Iba pang Tula ni Naty Martinez:

• Isla ng Homonhon
• Buhay sa Piling ng Lolo at Lola

Read more...

Tulang Filipino para sa mga Lolo at Lola

"Dapat lamang na ibigay ang nararapat na pagkalinga sa ating mga lolo at lola. Ang pagmamahal na hinahanap-hanap nila at ang pagtingin buhat sa atin na kanilang pamilya ay isang marangyang kayamanan at sapat na upang maging malaon pa hanggang sa susunod ang kanilang mga buhay.

Lolo at Lola

Hindi sila naghahangad ng maraming yaman o salapi ngunit kaipala’y nag-iibig lamang na maramdaman sa dapit-hapon ng kanilang buhay ang pagmamahal at pagmamalasakit. Huwag nating ipagkait sa kanila ang buhos na pag-ibig at pagkalinga sapagkat ito ay marapat lamang na gawin upang tumanaw ng utang na loob sa kanilang marikit at dakilang pag-ibig na iniukol sa atin. Basahin ang isang tagalog na tula para sa ating mga lolo at lola."

Buhay Sa Piling ng Lolo at Lola
ni: Naty Martinez

Kay sarap ng buhay ng isang dalaga
Lalo na't lumaki sa lolo at lola
Anumang naisin agad ay meron ka
Pagka't ika'y ginto sa paningin nila.

Ayos lang ang buhay kahit di gumawa
Bihis lang nang bihis di ka naglalaba
Di ka nagluluto pagkai'y nandyan na
Dudulog ka nalang pagka't may hain na.

Kay sarap kumain taas pa ang paa
Di ka nang-aalok pagka't huli ka na
Napag-iwanan ka sila ay tapos na
Pagka't kung gumising naku tanghali na!

Pag dumarating na ang mga pistahan
Damit na maganda sadyang kailangan
Di na tinatanong kung gusto ay ilan
Tiyak ibibili tatlo o apat man.

Nguni't pag may hiling at di napagbigyan
Agad magmamaktol di na mautusan
Papasok sa silid magkukulong na lang
Pag-amo sa kanya ang syang aabangan.

Ito namang lolo at itong si lola
Sa tampo ng apo takot na takot na
Agad kakatukin pinto ng silid nya
Tuloy aamuin nang tampo'y mawala.

Kay sarap magmahal ng lolo at lola
Lahat ng layaw ay ibibigay nila
Itong kasabihan naku totoo nga,
Mas mahal ang tubo sa puhunang punla..

Kaya't pag tumanda at may apo ka na
Iyong pagmamahal dapat ipadama
Lagi mong isiping ang lolo at lola
Nag-aruga sa iyo n’ung ika'y bata pa.

Tula ni Naty Martinez:

• Isla ng Homonhon

Read more...

Tagalog na Tula Tungkol sa Kalikasan

"Isang paglalarawan ng mga pagkasira ng mga kabundukan at ganda ng ating kalikasan dahil lamang sa iilang tao na ganid at walang inisip kundi ang magkamal ng sandamakmak na salapi. Ni hindi yata isinasaalang-alang ang susunod na henerasyon ng ating bansa. Isang saludo para sa sumulat. Mabuhay ka!"

Homonhon Island

Isla ng Homonhon
ni: Naty Martinez

Isla ng Homonhon kay gandang pagmasdan
Sa gitna ng dagat tila nakalutang
Ako’y nananabik ika’y mapuntahan
Nang maibsan naman yaring kalungkutan.

Tatlumpu’t dalawang taong nakalipas
Nang huling madalaw at ganda’y mamalas
Sana isang araw makamtan ang lunas
Nitong kalungkutang aking dinaranas.

Nalulungkot ako sa tuwing makikita
Sa mga litratong inilalathala
Bundok na kay ganda ngayo’y sinisira
Ng mga dayuhang hayok sa biyaya.

Oo nga’t ang iba doo’y kumikita
Sa yaman ng isla bigay ni Bathala
Nguni’t sana naman maisip din nila
Ang kahihinatnan bukas-makalawa.

Huwag nating hayaang tuluyang mawasak
Islang minamahal sa ganda’y busilak
Ang sinumang taong doon ay mapadpad
Angking ganda nito’y hahangaang tiyak.

Kaya’t di mawaksi sa puso’t isipan
Isla ng Homonhon baryo Casuguran
Sana isang araw muling masilayan
Ang napakagandang lupang sinilangan.

Iba pa:

• Isang Halimbawa ng Tagalog na Tula
• Maikling Tagalog na Tula

Side Note:

“Homonhon Island is located in the southern tipmost of Eastern Samar and is under the municipality of Guiuan, Eastern Samar. Historically speaking, Homonhon Island is the place where Ferdinand Magellan first landed.”
---Naty Martinez

Read more...

Tula para sa mga Dalaga

Isang Bukas na Payo para sa mga Umiibig at Magmamahal na Dalaga

Simsim
ni: Tess C. Alikpala

Aabutin,
Kukunin,
Susungkitin,
Lahat ng mga bituin.

Lalanguyin,
Tatawirin,
Sisisirin,
Dagat na malalalim.

Aakyatin,
Aarukin,
Gagapangin,
Mga bulubundukin.

Kakalabanin,
Aawayin,
Tatalunin,
Sibat na matatalim.

--------

Iyan,
Ganyan,
Lahat iyan,
Mga sumpa ng kabinataan.

Pangako,
Deboto,
Respeto,
Ng mga baguntao.

Upang,
Para,
Kaipala’y,
Mapasakamay ang dalaga.

Gaga,
Tanga,
Luka-luka,
Ang AGAD na maniniwala!

Isipin,
Dibdibin,
Damdamin,
Ang totoong layunin.

Nang,
Upang,
Malamang
Hindi lahat ng kumikinang
Ay gintong kayamanan!

Iba pang Tula ng May-akda:

Tagalog na Tula Tungkol sa Kabataan
Si Matandang Simeon

Read more...

Inspirasyon at Pagiging Makadiyos

Halimbawa ng Inspirasyon na Tula

Sa Diyos na Buhay
ni: Ariana Trinidad
(poem edited by: Kiko Manalo)

1
Ipaubaya mo sa palad ng Poon,
Itangis sa Taas at doon ituon,
At galit sa dibdib kagyat na itapon,
Upang sa daigdig ikaw ay maglaon!

2
Dalangin na sana'y iyo nang makita,
Buting nilalayon ng lalong Dakila,
Tumingalang dagli doon sa Bathala
Upang matukoy na ang tunay na nasa.

3
Hindi ito dapat - pakinggan lamang,
Dapat ay dinggin din hanggang walang hanggan,
Tinig na nagbuhat doon sa ulapan,
Ikabig sa dibdib, itibok din naman!

4
Kung sa pangangarap sa dilim ng gabi,
Tinanong mo na nga ang ibig isabi,
Tinig na nagbangon sa mga sandali,
Ay ang gabay mo sa mundong may imbi!

5
Itanong ang daing sa Mahal na Poon,
Kung sa diwa ay may tandang pananong,
Makikitang dagling hindi maglalaon
Ang sagot na ibig sa madaling panahon.

6
Aalagaan ka, kapag ika'y nanalig,
Kahit sinong kalaban iyong madadaig,
Sa Itaas ibigay, pagsamba't pag-ibig,
Kaligtasan ang bigay na premyong kapalit!

Other Example of Filipino Poems

• Tagalog na Tula Tungkol sa Relihiyon
• Tula na Tungkol sa Pasasalamat sa Diyos
• Ikaw, Ako at ang Tula

Read more...

Tula Para sa Kaarawan ng Isang Ina

Halimbawa ng mga Tagalog na Tula 

Rosas

Rosas
ni: Kiko T. Manalo

Kung ang pag-uusap ay mga kulayan,
Malapit sa pula ang paglalarawan,
Bagaman mabini ang pagkakakinang
Siyang kinahilig ng kadalagahan.

Ang rosas na kulay ay lamyos ng lambing
Na sa wari’y putla ng dugong mahinhin.
Ang tela ng blusa na anyong bibilhin,
Ang kulay na ito’y siyang pipiliin.

Pagkat paniwala na ito’y anino,
Ng pagkababae pati pagkatao,
At siyang pangulo nitong mga baro,
Pati nga panloob o maski na panyo.

Kung bulaklak naman ang pag-uusapan
Ang rosas ay lutang itong kahinhinan,
Ngunit mag-iingat may tinik din naman,
Sa mga panganib ay kanyang panlaban.

Bigyan ang dalaga ng mga bulaklak
Na tulad ng rosas kasama ang liyag,
Ang sagot na oo ay iyong matitiyak,
Na makukuha mo’t mapapasapalad.

Mapasabulaklak o mapakulay man,
Itinatangi ng maraming nilalang
Kahit na ihanay ang ibang kulayan
Ang rosas ang gandang katangian.

Ngunit bukod-tangi itong aking rosas,
Na pinaghugutan ko ng buhay kong hiyas,
Sa kanya inutang ang mga lumipas,
Nang ako’y musmos pa’t walang nilalandas.

Siyang nag-aruga’t nagbigay ng malay,
Kumakandili ri’t laging gumagabay,
Ang ina ko ang aking bulaklak sa buhay
Si Aling Rosas na - ilaw ko at kulay!

• Maikling Tagalog na Tula
• Tagalog na Tula Tungkol sa Relihiyon
• Tula para sa mga Pinoy

Read more...

Maikling Tagalog na Tula

Tatlong Halimbawa ng Maikling Tula sa Tagalog

Tag-ulan

NGAYONG TAG-ULAN
ni: Kiko Manalo

Magdala ng kapote ngayong tag-ulan,
Sa sakit at sipon, magandang panlaban,
Sakto rin sa lahat ng kalalakihan,
Upang AIDS, STD sadyang maiwasan!

Payong naman para sa mga babae,
2-folds, 3-folds o kahit na iyong malaki,
Double purpose ito lalo na sa gabi,
Sa holdaper at rapist, pwedeng pang-garote!

SAWSAWAN
ni: Kiko Manalo

Ikinasal kahapon si Mama Sita,
Si Papa Ketsup po ang napangasawa,
Umiyak ang karibal ng masuwerteng binata,
Si Mang Tomas ito na nakakaawa!

Ang nagkasal po sa magkasintahan
Si Datu Puti na lider ng angkan,
Namroblema naman bisita sa handaan,
Sapagkat ang nakahain ay puro sawsawan!

KAHULUGAN SA TAGALOG
ni: Kiko Manalo

SALUMPUWIT ang tawag at kahulugan
Sa "chair" o "bangko" na silyang upuan,
At kung nagtatanong at naguguluhan,
Sa "wheelchair" ang tawag ay SALUMPO naman!

Ang tagalog word naman para sa "panty",
SALUNGGUHIT na siyang tugma sa babae,
At kung tatanungin ang "brief" ng lalaki
SALONGGANISA itong sa iyo'y masasabi!

Read more...

Tagalog na Tula Tungkol sa Relihiyon

Halimbawa ng Tulang Tagalog

Ang Abo sa Noo ng Aba
ni: Jerome Apilla

Krus na sagisag ng pagpapakahirap
Ni Hesus na tubos ng sala ng lahat,
Sa krus namatay ng napakasaklap,
Bakit siya namang hinahaplos-palad?

Krus na sagisag ng dusa’t siphayo,
Ikakalat sa noo ng mga deboto,
Magpaparoon at magpaparito,
Palaspas, sinunog, nagka-abu-abo!

Nakatutuwa sa isang nag-iisip,
Na ang krus na tanda ng luha’t hinagpis,
Ay siya ding itatatak na parang mga lapis,
Sa noo na ang wika ako ay matuwid!

Ang abo sa noo ng may mga sala,
Daan para bukas ay bigla ding itatwa,
Balik sa kasalanang lubos na kay sama,
Wala ngang nagbago sa masamang gawa!

Araw-araw man nating lagyan ng abo,
Kahit abo iyan ng sunog na tao,
Kung ating uulitin ang ating pagkalilo,
Walang mangyayari, tuloy sa impiyerno.

Tataba lang ang bulsa sa abuloy at handa,
Pagdating ng hudyat ng mga kampana,
Ang tuloy ng tuwa sa pinto ba ng aba,
O sa Haring nakaupo sa trono ng Roma?

Sa pag-aabuloy ng perang kinita,
Bakit hindi na lang itulong sa madla,
Maraming Kristiyano ang nagsisipagdusa,
Nakaupong hari, walang ginagawa!

Pinagdadasal ka sa diyos na bato,
Pati nga sa kahoy, wala namang kibo,
Ang dasal mo dapat sa Diyos na totoo,
Bakit nakaluhod sa tansong rebulto?

Limangdaang taon ang nakalilipas,
Buhat nang makilala itong mga ungas,
Kahit niloloko nitong talipandas,
Yuko pa rin tayo, bukas pati palad.

Sa paghuhukom, isusulit ang lahat,
Lahat ng ginawa, lahat: may katapat,
Mabuting nilalang, langit: malalasap,
Ang lilo at sama, sa apoy ang bagsak!

At sa dagat ng apoy itong katapusan,
Lahat nitong mga walang buting lalang,
Dito lalangoy ang lahat ng lilisan,
Sa init mapupugnaw, mga kasamaan!

• Ang Filipino ay Wikang Panlahat, Ilaw at Lakas sa Tuwid na Landas
• Tula Tungkol sa Pag-ibig

Read more...

Tula Para sa mga Pinoy

Tula Para sa mga Pinoy

Pagsubok
ni: Cruz Luis Tampiong

Mag-agahan tayo ng buntung-hininga,
Higupin ngayon din, ating pagdurusa,
Gawin nating kape dito sa umaga
Mga butil ng luha at mga litanya.

Papakin ninyo ang mga pangamba
Na bukas uulit ganitong eksena,
Ilagay sa plato ang lahat ng dusa,
At manatili ka sa umuugang mesa!

Inyong tanghalian ay salat na pangarap,
Nagkulang sa kulay hindi nagkapalad,
Isabaw sa bahaw ang luhang pumatak,
Ipagharimunan pagkat hindi sapat!

Igisa sa mantika ang salat na pag-asa,
Kulang na kulang ba o walang natira?
Napipi’t nabingi - lungkot na ligaya,
Isusubo mo rin o iyong iluluwa?

Naglupasay naman para sa hapunan
Ang maraming hukay doon sa kanluran,
Dikit-dikit lagi ang pangangailangan,
Gutom mapapawi, lilipas din naman.

Isahok sa pait ang pangungulila
Gawing panghimagas ng gutom na sikmura,
Tamis na nalimot pati na sustansya
Lasapin ng dila, walaing bahala!

Ngunit kung kikilos ngayon saka bukas
Hindi magkukulang walang pagkamalas,
Kapalarang tuwid tiyak na lalabas
Patag na kalsadang hindi na madulas!

Sa hapag ng laban, magsikap manalo,
Bungkalin ang buhay saka iararo,
Upang mga sakit ng pagkasiphayo,
Mamatay sa putik at diwang matalo!

• Maikling Tulang Pilipino
• Tula Tungkol sa Pag-ibig
• 12 Pantig

Read more...

Isang Tula sa Kasalukuyan

12 pantig sa bawat taludtod

Alitaptap

Lakas at Landas
ni: JML

Aaminin ko ba kung may kahinaan,
Sino ka nga ba para pag-aksayahan,
At kung mayroon man nitong kalakasan,
Ano ba ang silbi sa ‘yong kapalaran?

Pag-uusapan lang, 'di naman diringgin,
Sapagkat ikaw man ay isang tuldok rin,
Sa lubak na ito’y lahat mga puwing
Alikabok tayong balik at naggaling!

Sa gitna ng guhit - ay naroon ako,
Pagkat walang pusong nagwikang totoo,
Akin mang ibulong, tunay' balatkayo,
Malasakit mo ay tiyak na naglaho!

At kung ilahad ko itong aking kislap,
Na ang aking puwet, tila alitaptap,
Ano’ng mahihita’t ano’ng makakalap,
Hindi ba libakin ang yabang ko’t siklab?

Sadyang walang tuwid sa lupang daigdig,
Kaunti lang itong nagmamalasakit,
Kung mayroon namang lubos ang pagkapit,
Ito’y mawawala kung danas ng sakit!

Ililihim na lang hanggang sa maglaon
Isisinungaling, ipakababaon,
Ililikod na lang itong mga layon,
Upang manatili doon sa kahapon.

Dito matatalos itong` kalahatan,
Ng misteryo nitong luha’t panambitan,
Ang hina ko’y isang kasinungalingan,
Pag-amin sa sala ang lakas ko naman!

• Tula sa Diyos
• Maikling Tulang Pilipino
• Malayang Taludturan
• Haiku

Read more...

Halimbawa ng Malayang Tula at Taludturan

Malayang Taludturan

Pansit Image Credit: http://lafang.mikemina.com/2005/11/26/lasang-pinoy-4-pancit-guisado/

Tagalog na Tula - Pansit Na Mahaba
ni: JML

Kung itakda man ng kung sino
Ang itatagal ng buhay ko,
Isang buwan at eksakto,
Walang labis o diskuwento,
Ang lahat ng pansit,
Sa restawran ng Instsik,
Lalantakan ko ng mabilis,
At hihintayin kung epektib
Na ang spaghetti at canton,
Saka pansit Malabon,
At pers klas na bihon
Ay pampahaba daw ng panahon.
Aba, kung pati na ang Viagra
Ay ganu’n ding nakakapagpahaba,
Sampu ang lulunukin ko kapagdaka
Kaipala’y tsumatsamba,
Na madagdagan pa
Kahit isang segundong hininga
Ang puso kong giba-giba.
Ang buhay kong sira-sira…
Sige, isasalalay ko ang buhay,
Sa kasabihang sumasablay,
Bakasakaling magtagumpay,
At hinding-hindi maglubay.
Igagawa ang mga palad,
At isisikad ko ang pakpak,
Upang makasinghap,
Ng kapiraso pang sarap...

Ngunit ‘yan naman ay “kung lamang”
Na mawala ako sa sarili ko’t mabuwang,
Sa loob ng saktong isang buwan
Sa pagitan ng buhay ko’t kamatayan.
Kaya nga iiwas-pusoy na magkasala
Ipananatili pa ring nakatingala,
Sa itaas nitong lupa,
Ang puso ko at unawa,
'Pagkat alam kong may higit na dakila
Kaysa sa pansit na mahaba...

Previous Posts:

• Ang Filipino ay Wikang Panlahat, Ilaw at Lakas sa Tuwid na Landas
• Malayang Taludturan
• Tula sa Tuluyan

Read more...

Tula Sa Diyos na May 12 Pantig

(Halimbawa ng isang tula tungkol sa Diyos Ama)

Aking Idolo Kahit Hindi ko Nakikita

Tagalog na Tula - Hindi Bobo Ang Aking Idolo
ni: JML


Sa kinamulatan kong pugad sa mundo,
Ang kinagisnang tatak - itong IDOLO,
Sa kalsadang panay sama at siphayo,
Siya itong dulo sa daang baku-bako.

Sa luksong wikang malamig at bahaw,
Wala mang tunog ay pumapaibabaw,
Sa dusa at luha ay makakapagsayaw,
Pusong nakagapos ay maigagalaw!

Langitngit ng sahig nitong kalangitan,
Katalik ng kanyang yapak na tuntungan,
Sa kamay na ningning, kanyang tangan-tangan,
Ang buhay mo’t bukas pati kamatayan.

Alam itong lahat ng iyong gawain,
Mula sa umaga hanggang sa dumilim,
Ang kulay ng puso kung ito’y maitim,
Ililigtas niya at papuputiin.

Malalaman niya guhit nitong puso
Kahit pilitin mong ipakatago-tago,
Ang diwang mahalay at isip na liko,
Hindi malilingid hanggang sa pagyao.

Palisin sa diwa ang kapanabikan,
Na gumawa ng lilo’t mga kasamaan,
Mundong pagnanasa at tawag ng laman,
Iwasang mahulog sa imbing kasalanan.

Siya ang AMA ko, ang naging simula,
Nitong isang ako na nagmula sa wala.
At wakas din namang ang tungo’y kabila,
Kung mapugto na nga ang aking hininga!

Paglalarawan: Tula na may 12 labingdalawang pantig at apat na taludtod, pitong saknong, maikling tula tungkol sa Diyos.

Previous Posts:

• Tula Tungkol sa Ang Filipino ay Wikang Panlahat, Ilaw at Lakas sa Tuwid na Landas
• Malaya Ako sa mga Pangarap
• Tagalog na May Tugma

Read more...

Ang Filipino ay Wikang Panlahat, Ilaw at Lakas sa Tuwid na Landas

Isang Tulang Filipino Para sa Buwan ng Wika 2011

Ako’y Wika
Orihinal na tagalog na tula ni: Kiko Manalo

Wikang Filipino ang aking pangalan,
Ipinanganak ko itong kalayaan,
Ako ang ina at siyang dahilan,
Ng pagkakaisa at ng kasarinlan!

Sapagkat ako nga ang siyang tumanglaw
Sa bansang tahanang iyong tinatanaw,
Katulad ng inang sa iyo ay ilaw,
Nagbibigay-sigla’t buting sumasaklaw!

Ako rin ang ama at naging haligi,
Ng mga sundalo at mga bayani,
Sa digmaan noon sa araw at gabi,
Ako ang sandatang nagtaas ng puri!

Pagkat akong wika ang lakas mo’t tuwa
Ako’y lakas nitong bisig mo at diwa
Sa pamamagitan ng aking salita,
Ligtas ka sa uring luksong masasama!

Sinalita ako at gamit ng lahat,
Upang mga taksil ay maisiwalat,
Sa Luzon, Visayas, sa lahat ng s’yudad,
Pati sa Mindanao, ako ay nangusap!

At nakamit mo na ang hangad na laya,
Mula sa dayuhang sakim at masama,
Dilim na sumakop sa bayan at bansa,
Dagling lumiwanag, pintig ay huminga!

Wikang Filipino, ginto mo at hiyas,
Panlahat na wika saan man bumagtas,
Ilaw na maalab, sa dilim ay lunas
At lakas patungo sa tuwid na landas!

Tema para sa Buwan ng Wika: Ang Filipino ay Wikang Panlahat, Ilaw at Lakas sa Tuwid na Landas

Previous Posts:

• Tula sa Filipino
• Isang Pasalaysay na Tula
• Ikaw, Ako at ang Tula

Read more...

Ikaw, Ako at ang Tula

Marapat lamang na ating pagyamin ang tulaang Filipino. Ito’y maituturing na isang kayamanan sa sining, kultura at literatura ng Pilipinas. Alagaan ito, arugain ng lubos at ituring na asawa, kasintahan o kalaguyo. Ipagtanggol ito sa sinumang lalapastangan at hindi magpapakundangan. Ang tula ay sining… sining na salamin ng iyong bansa… bansa na siyang pagkatao mo, dapat mong pangalagaan at mahalin gaya ng iyong sarili.

Credit:   jeannewilkinson.blogspot.com

TRI-SAM
ni: Nene Cristobal

Ihalik mo ako sa pisngi ng tula,
At iyakap mandin sa mga salita,
Himasing mainam itong mga tugma,
Upang madama ko ang libog at tuwa.

Sa mga kataga'y idikit ang labi,
At saka paikutin sa pagluwalhati,
Dila ay ilabas himuring mabunyi,
Tiyak malilimot ang luha't pighati!

Hagurin ng palad ang ugat kong uhaw,
At sa kadilima'y pumintig ng sayaw,
Paigtinging lubos ng munting mga galaw,
Ang titik na siyang tinig na mapanglaw!

Ihiga mo kami sa wikang Tagalog,
Kumutan ng letra't padapang lumuklok,
Umulos kang kahit tila nauupos,
Malalasahan mo ang luto ng Diyos!

Sambahin ang katas na dito'y nagdaloy,
Dito tilamsikin at ituloy-tuloy,
Ang wika kung ginto ay maisasaboy,
Sa kapwa nilalang na ibig magluoy!

Kuyumin ang kuwit nitong aking puso,
Lamasin ang tuldok ng luksong mga dugo,
Ang tandang pananong na siyang nagbugso,
Tandang padamdam ang 'yong ipangsuyo!

Kung ikaw man ay mangagdalang-hiya,
Sa paglalayag natin sa pagkakasala,
Ikaw saka ako kasama ng tula,
Magtatalik tayo hanggang sa magsawa!

Hiwaga ang siyang makikipagniig,
Sa ating tatlo, sa papag o sahig,
At kung maabot ang rurok ng langit,
Kalamnan at buto - tiyak manginginig!

Huwag na rin nating isaalang-alang,
Kung magbubunga man ang pagmamahalan,
Pagkat bungang-supling ng pag-iibigan
Magdudulot naman ng kapanabikan!

Previous Posts:

• Maikling Tulang Pilipino
• Tagalog na Tula Tungkol sa Kabataan
• Si Ana Manila

Read more...

Malayang Tagalog na Tula ng Isang Makata

Halimbawa ng Malayang Taludturan na Tula

Isang tugmaan na malaya at walang sukat ang siyang nais ibahagi ng tulang Filipino na ito. Sa mga talata ay mababakas ang masidhing pagnanais na mailahad ang isang damdamin at kaisipan ng makata sa mga taong iwinawagayway na sila ay kuntento na sa buhay ngunit sa tunay na pangyayari ay malayo sa katotohanan.

KUNTENTO
ni: Kiko Manalo

Ito lamang ang paraan
Nang maraming nilalang,
Na maramdaman
Sa gitna ng kanilang buhay,
Na sila ay wagi
Sa pinasok na larangan,
At pinagkakaabalahan,
Sa pintig at kamatayan.
Ito rin ang paraan
Upang maitagong mainam
Ang kanilang pagdaramdam.

Kahit na lupasay,
Sa ikot ng buhay,
Pinipilit ibulong,
Sa pintig na panahon,
Na sila’y walang angal,
Kahit katiting man lamang
At hindi mga hangal,
Ngunit sa katotohanan,
Ay nag-uumapaw
Ang kanilang pagkauhaw!

Ito rin ay katwiran
Ng mga taong takot,
Sa pagkabagot,
Na may laksang lumot,
Sapagkat hindi umiikot
Ni umaabot
Sa pinakarurok
At naghihimutok,
Sa kanilang pinasok,
Na pakikihamok.

Ikinukundisyon ang ulo,
Na siya ay kuntento,
Sa kasalukuyang tinutungo,
Kahit walang nabubuo,
Kundi pagbabalatkayo,
Hanggang mapagtanto,
Na kaniyang niloloko,
Ang utak niya’t puso
Na kuntento siya
Sa ikot ng mundo.

Previous Posts:

• Isang Tula sa Malayang Taludturan
• Isang Pasalaysay na Tula
• Tagalog na Tula na May Tugma

Read more...

Tagalog na Tula na May Sukat at Tugma

12 Pantig sa Bawat Taludtod

Diyos ang Bahala

Diyos ang Bahala
ni: Ariana Trinidad

1
Kung tatayo ako sa gitna ng g’yera,
at sasabihin kong tumigil na sila,
pagpapakamatay’ aking mapapala,
mabuting magdasal sa D’yos na dakila!

2
‘Pagkat nakalimbag nga sa Kasulatan,
bansa sa mundo ay magsisipaglaban,
kasali pa dito pati kaharian
at magsisitindig, lilong kasamaan.

3
Magtataka ba kung natutupad ito,
daigdig, sa ngayon ay tila imp'yerno?
tumatatak lamang ang tusong demonyo,
kayang ipaglayo ang buklod ng tao.

4
Sino ba ang dapat na ating sandigan,
hindi ba Diyos na dakila't mainam?
at kung mananalig sa kapangyarihan,
Diyos ang bahala sa kinabukasan.

5
Espiritu lamang ang makasusupil,
sa mga alibughang ‘di na mapigil,
sama't kasalanang doo'y nakahimpil,
dagling matutunaw pati mga taksil!

6
Ang bansang sa asta ay tila nga hari,
maliit na masa ay nilulugami,
tiyak ang parusa ang apoy ang saksi,
hindi na aahon kahit na magsisi.

7
Ang mga nilalang na ganid sa laman,
at hayok sa lakas ng kapangyarihan,
inagaw ang ginto’t mga kayamanan,
siguradong pugnaw sa init ng kalan!

8
Kaya kung tayo ma'y umiiyak ngayon,
asahang sa oras nitong paghuhukom,
sa ligtas na pook ang tuloy ng layon
na tungo ng paa - kasama ang Poon!

Previous Posts:


• Tula na Tungkol sa Pasasalamat sa Diyos
• Tagalog na Tula na May Tugma
• Isang Halimbawa ng Tagalog na Tula

Read more...

Isang Pasalaysay na Tula

Halimbawa ng Tula na may Tugma

Si Matandang Simeon

Si Matandang Simeon
ni: Tess C. Alikapala

Gumising sa umaga,
Nag-inat-inat muna,
Nagpatulak ng sigla,
Sa kapeng walang lasa.

Magpapawis maghapon
Itong si Tandang Simeon,
Siya ay isang piyon,
Sa isang konstruksyon.

Kanina’y nagbaon
Ng kanin sa dahon,
Ulam na talong,
Wala man lang bagoong.

Nagmeryenda siya
Ng buntunghininga,
Walang laman ang bulsa
Kahit na barya.

Nilunok ang laway,
At saka dumighay,
Dagling nanlupaypay,
Sa lasa’y naumay

Palad na makalyo,
Ipinahid sa noo,
Upang matuyo
Ang pawis at dugo!

Kahit ang daliri
Nginig na madali
Pinilit ngumiti,
At gumawang mabusisi.

Sa oras ng uwian,
Paghudyat ng orasan,
Naglalakad lamang,
Pauwi sa tahanan.

Mata’y ipinikit,
Nagdasal ng saglit,
Pagal na sa lupit,
Sa abang sinapit!

Sasalubong ang anak
At ang kabiyak,
Ngingiti siya sa galak
At saka hahalakhak!

At napapawi na
Ang pagod at dusa
Galak ang pamilya
Karugtong ng hinga.

Kakayanin ang buhay
Sarili ang alay
Pamilya ang saklay,
Saksing kaagapay.

At sa kinabukasan
Muling ipapasan
Mga krus sa daan
Sa lubak ng bayan.

Ipupuhunan na naman
Ang mga buto at laman
Upang may mailaman
Sa kalam na tiyan!

Si Matandang Simeon - Filipino poem ni Tess C. Alikpala - halimbawa ng tulang pasalaysay.

Previous Posts:

• Sintang Pagkakaisa Isang Tulang Tagalog
• Tagalog na Tula sa Tuluyan
• Tula sa Filipino Si Ana Manila

Read more...

Sintang Pagkakaisa Isang Tulang Tagalog

Halimbawa ng Tulang Tagalog

Pagkakaisa / Image: news.mindanao.com

Sintang Pagkakaisa
ni: Kiko Manalo

Sintang Pagkakaisa!
Saan ka sumuling?
Tila naligaw ka ng iyong landasin,
Narito ang anak, iyong kandungin,
Uhaw na uhaw sa iyong pagdating!

Sintang Pagkakaisa!
Saan ka nagtungo?
Hindi ba dapat na sila ang humayo?
Maraming nilalang ang nagbabalatkayo,
Nagkukubling oso sa imbi ng mundo!

Sintang Pagkakaisa!
Bakit natapilok?
Sa daang mainam ay nakikihamok,
Bumangon ka ngayon, saka pumalaot,
Haplusin itong puso ng dito'y nanasok!

Sintang Pagkakaisa!
Gising ba ang dibdib?
O sadyang nahimbing at napasaliblib?
Laksa ng langayang maghari ang ibig,
Ikaw na nga sanang bahalang umusig!

Sintang Pagkakaisa!
Nasaan ka?
Kubkubin ngayon din nitong pagkalinga!
Yakaping mahigpit ng pag-aaruga!
Halikan mo ang puso, pati kaluluwa!

Sintang Pagkakaisa!
Ngayon ay nariyan,
Ang hiwa-hiwalay na buto't kalamnan,
Nawa ay magsilbing isang kapagkitan,
Upang mangagdugtong ang sangkalupaan!

(likod-bahay 2012)

Sintang Pagkakaisa - tula ni Kiko Manalo - halimbawa ng tula tungkol sa pagkakaisa

Read more...

Tula Tungkol sa Pag-ibig

Tagalog Love Poems

O, Pag-ibig!

Oh, Pag-ibig ...
ni: Sweet Lapuz

Pag-ibig na ito’y pagkagulo-gulo,
Kung minsa’y baluktot, kung minsan ay wasto,
Bulag ang katulad, tila nalilito
Kung minsa’y may sakit ng pagkasiphayo.

Ngunit kung tunay nga, wagas at dakila,
Madarama nama’y kilig sa simula,
Sa gitna ay ngiti at dulo’y may tuwa,
Kung magmamahal ka ng tapat at akma.

Sa daraang araw, oras at sandali,
Kahit na mag-isa, ikaw ay ngingiti,
Kung maaalala ang suyuang huli,
At ang matatamis na sintang mabuti.

At ang minamahal kung makakapiling
Ay tila kaybilis ng oras sa dingding
Hahalik sa pisngi at saka yayakapin,
Limot ang problema, hindi makakain.

Kung ika’y iibig, tandaan mo lamang,
Ang tunay na kulay, sikaping sulyapan,
Pagkat marami diya’y nagpapanggap lamang,
Sa baba ng lupa ang pinanggalingan!

O, Pag-ibig - ni Sweet Lapuz - halimbawa ng tulang Tagalog na tungkol sa pag-ibig.

Tagalog Love Poems

Read more...

Tula sa Filipino: Si Ana Manila

Halimbawa ng Tulang Tagalog

(Example of Tulang Filipino)

“Most of the youth today use their times in video games and internet gaming network rather than spending time studying. They seem to enjoy these activities, ignoring the consequences.

Si Ana Manila ng Lansangan
ni: Sweet Lapuz

Bigo si Ana Manila sa kanyang pangarap
Na tinatahi-tahi niya sa isip at dibdib,
Natunaw lahat…
Hindi pala…
Naudlot lahat,
Sapagkat walang nabuo kahit isa.

Hanggang diyan ang pisi
Ng ligaya niyang walang humpay,
Dahil sa itim na budhi,
Na ayaw maglubay,
Kaya ang kanyang buhay,
Laging sablay.

Sarap sana ng higop niya
ng sabaw ng nilaga,
At pangal niya ng lechong paksiw
Na may sauce na ang timpla
Ay tamis-anghang ng asukal at paminta,
Wala na… wala na… tiis siya!

Hanggang wakas sana
Doon sila magkikita
Ng imbay ng tagumpay,
Doon sa simula,
Makakasama niya naman
Pero, wala na… puro katapusan!

Pagkat hindi siya nagtiis,
Hindi nagpapawis,
Kapiling niya ngayon,
Langaw na gumon
Gumon sa kanyang dungis,
At paghihinagpis!

(kayod-kalabaw 2012)

"Video games and other related internet-based activities such as social networking sites can affect their personalities their lives as well. They can become addicted to these habits and will eventually ignore their studies and tasks.”

Si Ana Manila ng Lansangan - tula ni Sweet Lapuz - halimbawa ng tulang Filipino tungkol sa kabataan.

Halimbawa ng Tulang Filipino

Read more...

Maikling Tulang Pilipino

Maikling Tulang Pilipino

(Short Tagalog Poem in the Philippine)

Welga

Welga
ni: Ariana Trinidad

Dadaanin sa sigaw,
Ang bulong ng utak,
Sa simulaing naligaw,
Malalim din ang babaw!

Sa kalsada ibabandera,
Mga watawat ng pagdurusa,
Laban ng kasama,
Ipakikibaka!

Ang pait sa damdamin
Ay tamis na gagamitin
Upang makapiling
Ang minimithing lilim.

Ang diwa ng unyon,
May pusong lilingon
Makakasumpong
Ng dakilang panginoon!

Huwag kalimutan
Ang pakikipaglaban
Ay hindi sandigan
Para sa sariling kapakanan!

MANILA, Philippines - It's all systems go for Philippine Airlines Employees' Association's (PALEA) planned nationwide strike even as the government undertakes a last-ditch mediation bid to resolve the labor dispute at the flag carrier.

But PAL assured the public it was "ready for a worst-case scenario."

PALEA held a big rally a the Ninoy Aquino International Airport (NAIA) Terminal 2 Friday afternoon, saying this was a "dress rehearsal" for the actual strike, which may happen anytime soon.

The union filed the results of its strike vote before the Labor Department last week, and the so-called 7-day cooling-off period lapses today, April 1. The Labor Department has yet to issue its take on this.

The strike, which will be the union's first since 1998, is aimed at paralyzing the operations of PAL, which obtained green light from Malacañang to spin off its non-core units and lay off some 2,600 workers.

“PALEA is 100% ready for a strike that will paralyze the operations of PAL that, in cahoots with the Aquino government, wants to deny workers the right to regular jobs and a collective bargaining agreement (CBA). The only thing that can prevent a strike is for PAL to heed the demand to stop outsourcing and open CBA negotiations without preconditions,” said Gerry Rivera, PALEA president and vice chair of Partido ng Manggagawa (PM), in a statement. Read full story… ABS-CBN News

Read more...

Tagalog na Tula na May Tugma

Ito ay isang halimbawa ng tula sa Filipino na may tugma ngunit walang sukat.

Katarungan

Katarungan
ni: Nene Cristobal

Magagasgas lamang - mga lalamunan,
Nitong mga lobong lipad sa ulapan,
Marami man itong kanilang mga bilang,
Hinding-hindi naman tiyak pakikinggan.

Kahit na sa buwan itong hinanakit,
Ilipad ang daing, hinagpis at sakit,
Papuputukin lang ang pintog na ganid,
Matulis ang kuko ng hayok sa langit .

Sa paghahanap ko nitong katarungan,
Baka makarating sa kinabibilangan,
Nitong mga pigtas ang hingang nilalang,
Na naghihintay doon sa krus na daan.

Kung sa lupa’y kinang ay sadyang mailap,
Nitong katarungang ibig na malasap,
Hayaang lumuha't dugo ay pumatak,
Pagkat nasa langit ang tunay na galak.

Mabuti-buti pa na ipasaitaas,
Ang ibig makamit na ngiti at gilas,
Ang katarungang libing na at agnas
Makakatalik kung dating na ang wakas!

(biling-baliktad 2012)

Katarungan - tula ni Nene Cristobal - halimbawa ng tagalog na tula

Iba pang Tula ni Nene Cristobal

1. Pagbabago - Tagalog na Tula sa Tuluyan

Read more...

Halimbawa Ng Tulang Pasalaysay

Tagalog na Tula Tungkol sa Empleyada

Maraming tao ang pumapasok lamang sa trabaho upang kunin ang suweldo. Ang tanging iniisip ay ang makukuhang pakinabang at hindi ang matapos ang kanilang mga gawain. Ito ay isang halimbawa ng isang pasalaysay na tula sa tagalog.

ANG HUWARANG EMPLEYADO
ni: Sweet Lapuz

(Employee sa isang design firm sa Mandaluyong. Malayang tulad ng ibon, malawak na tulad ng panahon. )

Late ng dumating sa opisina,
Itong huwarang empleyada,
Inuna muna ang tsika,
Sa katabi niyang kasama.

Pagkatapos ng tsismis
Tungkol sa showbiz,
Nagpulbos ng manipis
Sa mukhang malangis.

Pitong beses inulit-ulit
Ang paghalik ng lipistik,
Pitong ulit iginuhit
Ang kilay na malantik.

Alas diyes na impunto
Nang matapos magpolbo
Ng powder sa noo,
Break time na ng empleyado.

Nagpa-charming na inaya
Ang kasamang empleyada,
Nagteka-teka muna
Sa pagmemeryenda.

Naghudyat ang alas onse,
Saka pa lang inubos ang kape,
Habang daldal sa pagsasabi
Ng mga tsismis sa tabi.

Nang bumalik sa opisina,
Itinuloy ang istorya,
Ng kung sinong artista
Na bakla palang rumarampa.

Alas dose na nang matapos
Habang nagkapaos-paos,
Lunch naman ang idinaos
Kasabay ng kaniyang boss.

Nakaidlip sa kabusugan,
Ang mesa ay tinulugan,
Alas-dos ang nagisnan
Na panahon sa orasan.

Nagpahid lang ng laway,
At saka uli naglagay
Ng pinturang makulay
Sa mukhang hindi tunay.

Three o’clock habit
Nang computer ay ikabit,
Nagkonek sa internet:
Para Facebook ay ma-update.

Alas kuwatro kuwarenta’y singko,
Nang biglang pumasok sa ulo
Na mayroon palang trabaho
Na dapat na maareglo.

Aba, teka nga pala,
Alas singko na, iha!
Kailan mo na magagawa
Ang trabahong nakapila?

Heto nga’t katapusan na ng buwan
Sweldo na pala ng empleyadang huwaran
Akalain mo nga naman,
Nakaraos nang paganun-ganun lang!

Paliwanag o Paglalarawan ng Tagalog na Tula:

Isang pasalaysay na tula na naglalarawan ng isang pangyayari sa buhay ng isang empleyado. Ang tula ay may tugma ngunit walang sukat na taludtod at katangian.

Read more...

Tula na Tungkol sa Pasasalamat sa Diyos

Tagalog na Tula na May 12 Pantig sa Bawat Taludtod

Isang uri ng tagalog na tula na panalangin sa Diyos. Ang halimbawa na ito ay may sukat at tugma na alay, pasasalamat at dasal ng makata sa ating Panginoon. Ito ay maaaring gamitin sa proyekto sa Filipino.

PASASALAMAT
ni: Kiko Manalo

(Isang college student sa BSU. Kung walang klase madalas siyang makikita na gumagawa ng tula sa ilalim ng isang punongkahoy.)

Salamat, Ama ko, sa mga nagdaan!
Pinagtibay akong tila sa kawayan,
Alin mang unos at bagyong nakalaan,
Ako’y lumiwanag, walang kadiliman!

Patawad naman po, O, Dakilang Bathala,
Sa imbay ng aking pagiging masama,
Aking karupukan, sa tukso’y mahina,
Pinagsisisihan aking naging sala!

Naninikluhod, sa iyo’y nananangis
Tuloy mo lang sana, iyong paghuhugis;
Patawad sa lahat ng aking mga dungis
Patawad sa aking pagiging malihis!

Ang kariktan mo’t iyong luwalhati,
Aking iningatan sa libot ng dumi,
Pagyayamanin ko iyong mga buti,
Ako, pagkat tao, iyong pag-aari!

Daing ko rin naman sa iyong paanan,
Pagtibayin ang aking mga kahinaan,
Bigyan mo ng sapat na diwa’t katatagan
At likas na ipunla mga kabutihan!

Papasakop ako sa iyong mga utos,
Magiging matatag sa lahat ng ulos
Aking ilalagay sa puso ko’t kilos
Ako’y anak mong sa aral ay lipos!

Sa araw at gabi’y magpupuri sa iyo
Walang hangganan mo’y dadakilain ko,
Sa inog ng mundo, sa buhay kong ito
Ikaw lamang Ama! Hindi ang demonyo.

Hanggang dito na muna ang aking pag-usal,
Salamat na muli sa aking pag-iral,
Idinadalangin, ipinagdarasal,
Sa pangalan ng anak mo: si Hesus na mahal!

Paliwanag o Paglalarawan ng Tagalog na Tula:

HINDI AVAILABLE

Read more...

Isang Tula sa Malayang Taludturan

Halimbawa ng Isang Tula sa Malayang Taludturan

Madalas gamitin ang malayang taludturan o tula sa tuluyan ng mga makata upang maipahayag sa madamdaming pagsulat ang mga nasa puso at isipan. Inampon na rin ang gawaing ito sa ating bansa partikular na ang mga kabataan na mahilig sa tula at nagnanais na maging makata.

MALAYA AKO SA MGA PANGARAP
ni: Cruz Luis Tampiong

(Nag-aaral sa Gen. T. de Leon National High School. Pangarap niyang maging isang sikat na makata sa hinaharap na panahon at maging isang kilalang manunulat ng mga tula sa tagalog gayundin sa malayang taludturan.)

Nangangarap ng dilat;
Ngunit walang unawa
Walang diwa,
At hindi masalat…
Hindi makatulog
Hindi makadulog
Pagkat walang maaninaw,
Hindi makasingaw
Ang mga pangitain
At ang mga mithiin.

Dito na lang sa sulok
Sa ibaba ng rurok,
Sa langit ibinabato,
Sa taas inihihiyaw
Sa alapaap isinisigaw
Ang sibat ng dasal
At purol ng punyal
Dito…
Na wala naman yatang
Nais sumalo!

Narito sa pait na hapit
Kapiling ang mga haliparot
na pangarap at sakit
Ang mga maharot at malikot
Na sustansyang wala
Sa sulok ng bulsa
Pagdurusa ang tanging
Sa tuwina’y kapiling
Sanhi marahil
Ng kasalanang hilahil.

Ngunit may pag-asa,
At may ligaya
Hindi laging luha at dusa
Ang sukli sa hamon
Ng kahapon
Sa hukay ibabaon
Mararanas din ang anas
Ng bukas
Hatid ng sikap na pumalag
Sa magdamag.

At baka dito sa sityong ito
Baka narito
Ang daan sa kaliwang bahagi
At sa kanang pagmumuni-muni,
Baka narito
sa kalsadang mabato
Ang buhay…
Ang ligaya…
Ang saya…
Ang tuwa!

Baka narito sa dulo
Ang ngiti,
Ang halakhak
Na may lalim
Na payak
Hindi gaya ng paghamak
Sa mundong lubak-lubak
Na libre sa mga naglalakbay
At ayaw maglubay
Sa luksong-tinik ng buhay!

Bukas bubukas ang bukas na katuparan
Ng lahat ng pintuan ng langit
Indayog ng tagumpay
Makakamit hindi ipagkakait
Mararating ang ibig marating
Sa tulong ng hiyaw ng sarili
Na kasama ang bulong

Paliwanag o Paglalarawan ng Tagalog na Tula:

Naglalarawan ng madamdaming pagnanais na maisakatuparan ang mga pangarap. Ang makata, bilang isang mag-aaral, ay ibig na ibig pumasok sa isang larangan na hindi niya maisip kung siya ay magtatagumpay. Isang halimbawa ng malayang taludturan o tula sa tuluyan sa wikang Filipino o Tagalog.

Read more...

Tagalog na Tula Tungkol sa Kabataan

Tula na May Tugma ngunit Walang Sukat

Isang halimbawa ng isang tula na may apat na taludtod sa bawat saknong. Malayang taludturan din maituturing sapagkat ang bawat taludtod ay sinadyang walang sukat ngunit matibay na nailahad ang ibig na sabihin ng makata. Ang tagalog ay mayaman sa mga salitang maaaring gamitin upang maiparating ng isang tao ang kanyang nasa sa loob ng mainam at nasa tugmang mga salita.

KABATAAN
ni: Tess C. Alikpala

(Ang kabataan niya ay halos ginugol sa pagsusulat ng tula at ngayon ay gumagawa pa rin ng paraan upang gumawa sa kabila ng kanyang mga trabaho at gawain bilang isang call center agent, isang kaibigan, isang ina at isang asawa.)

Nakatunganga,
Nakatulala,
Nangangalumata,
May tamang hinala.

Nagmumuni-muni,
Wala naman sa sarili,
Tumatawa, tumitili,
Iiyak pa nang kaunti.

Nasa sulok,
Nagmumukmok,
Baril nakasuksok,
Maya-maya’y mag-aamok.

Nasirang bait,
Pagkatao ang kapalit,
Saka pumipilipit
Alipin ng lupit.

Hindi makatulog,
Walang antok,
Pagkat lugmok
Napakarupok.

Ginawang sandata
Ang bisyo at droga,
Walang pagsala
Buhay nasira.

Kawawa…
Nagpakasira…
Hindi pinagana…
Ang puso at diwa!

Paliwanag o Paglalarawan ng Tagalog na Tula:

Maraming kabataan ang naligaw ng landas at inilarawan sa mga saknong ng tagalog na tula ng ito. Inilahad ng makata ang kanyang obserbasyon sa mga kabataan sa kasalukuyang panahon na nalulong sa iba’t ibang halimbawa ng mga bisyo at masasamang kaugalian.

Read more...

Tagalog na Tula sa Tuluyan

Tula Tungkol sa Pagbabagong-Buhay

Ang tula sa tuluyan sa Pilipinas ay tinatawag din naman na free verse sa wikang English. Ang uri ng tula na ito ay hindi nagbabatay sa sukat (metering) o tugma (rhyme). Ngunit sa gitna nito, kinakailangan pa rin na magkaroon ng porma (form) at sining (poetic art). Ang tula sa tuluyan ay pangkaraniwan nang ginagamit ng mga makata upang maihatid sa kanilang mambabasa ang kanilang kaisipan sa pamamagitan ng malayang taludturan.

PAGBABAGO
ni: Nene Cristobal

(Tungkol sa Makata: Isang maybahay at ina ng tatlong anak na ang libangan ay ang gumawa ng tula habang nasa bahay. Mahilig ding magluto at makinig ng tugtugin sa radio.)

Sa tigang na lupa,
Ipapatak
ang luha ng langit,
Sa bitak ng bukid,
Ibubuhos,
ang dusa ng dibdib.

Matitighaw ang uhaw
Ng pagdaralita,
At pagdurusa
Sa ligayang tunog,
Ng kulog
Na bubusog!

Mapapawi ang pagkatuyot ng labi
Ng pagkatao’t sarili,
Na lugami
Sa pagsisisi
At lalagi sa diwa
Pagbabago ng budhi.

Babasain ng mga patak,
Ang init at alab
At hihintayin ang aliwalas,
Ng langit,
At ang sakit
Na naitatak ng lupit.

Upang matanaw
Ang bahagharing nakaguhit
At nakaukit,
Sa dilim ng parisukat
Na mundong may lamat,
At hindi nasusukat!

Babangon ang lamig
Sa ligalig
Upang masakop
Ng halakhak,
Hindi ipagkakait
Pagkat sabik…

Pagkat sabik!

Paliwanag o Paglalarawan ng Tagalog na Tula:

Ipinadarama ng sumulat ng tagalog na tula kung paano niya ibig na magbago ng buhay upang makita niya ang liwanag. Nais niyang ipadama sa kanyang tula ang pagnanais na maging daan din naman sa pagbabago ng ibang tao at matulungang makabangon sa mga pagdurusa.

Read more...

Isang Halimbawa ng Tagalog na Tula

Halimbawa ng Tula sa Tuluyan

Ano ang tula sa tuluyan? Magbigay ng isang halimbawa sa tagalog. --- Sa simpleng paliwanag, ang tula sa tuluyan ay isang uri ng panitikan sa Pilipinas na paglalahad ng tula sa pamamagitan ng tuwiran o malayang taludturan na hindi kinakailangan ng sukat o tugma sa anumang bahagi ng akda. Ito ay nagtataglay ng madamdaming paglalarawan ng anumang tema na may kahalintulad sa isang sanaysay. Ngunit upang maiba naman sa sanaysay/essay, ang tula sa tuluyan ay kailangang magtaglay ng madamdaming kaisipan upang hindi mawalan ng gana ang sinumang bumabasa. Narito ang isang halimbawa ng isang tagalog na tula sa tuluyan.

NASA KANYANG MGA KAMAY
ni: Jerome Apilla

(Tungkol sa makata: Isang 4th year high school student na nais ibahagi sa iba ang kanyang mga tagalog na tula. Kasalukuyang nakatira sa Pililia, Rizal, Philippines kasama ang kanyang mga magulang.)

Nagsisigaw sa bangketa
ng kalsada,
ang mga saksi
sa pangyayari.

Labas pati litid
na tila mapapatid.
Ngunit tila mapait,
Hindi kasi alam kung bakit.

Mapula ang dumanak na dugo
Ng pinatay na tao
Kasing tingkad din kaya
Ng kaniyang kaluluwa?

Naglakad lang sa kaye
Ang bumaril na lalaki
Tila namamasyal lamang
Sa gitna ng kawalan.

Binayaran siya
Ng barya-barya.
At binigyan din naman
Ng mga dahilan.

Upang labanan
Ang kalaban,
At para ituring na kalaban
Ang hindi naman niya kalaban
Kundi kalaban ng bayan.

Paliwanag o Paglalarawan ng Tagalog na Tula:

Sa mga saknong, madarama ang kasamaan sa isang kapaligiran. Makikita rito ang madalas na krimen at mga malalagim ng pangyayari na sukat ikabigla ng mga karaniwang mamamayan. Pinaigting ng makata ang imahinasyon ng bumabasa sa pamamagitan ng isang tagalog na tula sa tuluyan at pinaikot niya sa kanilang isipan ang mga tunay na kaganapan sa isang lipunan.

Read more...